Mga batang kabus lingawon sa CCPO

CEBU, Philippines – Mga batang anak sa mga kabus nga pamilya  gikan sa Barangay Mambaling, Cebu City, lingawon sa mga polis bisan sud lang sa usa ka adlaw isip pinaskohan kanila. Ang Cebu City Police Office mipili og 51 ka mga batang nag edad singko hangtud 15- anyos.  Matud pa ni Chief Inspector Enrique Belciña ang hepe sa Police Community Relations (PCR) sa CCPO nga nahinabi sa Banat News.

Gibutyag ni Belciña nga ang kanhi hepe sa CCPO nga Senior Superintendent Noli Romana ang nakahunahuna sa maong programa niadtong nakalabay nga tuig tungod sa nadiskubrehan niini nga dunay usa ka polis sa CCPO nga naghimo niini sa kaugalingon niining paagi ug kwarta.

Pipila ray nakahibalo nga si Senior Police Officer 3 Isagani Ceniza, permi nang naghimo niini sud na sa pipila ka tuig, apil sa iyang gihimo ang Bible study ug magpakaon sa mga bata sa Mambaling.

Kini maoy nakit-an ni Romana ug buot niya nga mas daghan pang matabangan ang mga polis kun sila sa CCPO maoy mohimo niini.

Si Ceniza nga nahinabi sa Banat News mihangop sa programa sa CCPO alang sa mga batang kabus. Sa programa karon sa CCPO, ang tanang hepe ug deputy chiefs sa tanan nga buhatan sa CCPO kinahanglang mobarog isip amahan sa usa ka bata gikan sa napilian, sud sa usa ka adlaw aron sila lingawon, pakan-on aron mabati nila ang espiritu sa Pasko. Usa sa mga bata nga napilian mao si Jun-Jun, 10 anyos, kinsa mibutyag sa Banat News nga ang gusto niya nga regalo sa Pasko mao ang pang Noche Buena sa ilang pamilya.

Si Jun-jun miingon nga trabahador ang iyang amahan ug wala say trabaho ang iyang inahan ug duna pa kini gamay nga manghod.

“Panghanda sa Pasko ang gusto nako sa balay kay wala man mi kwarta,” sigun pa sa bata.

Samtang si Jonalyn, 8, miingon nga sandals ang iyang gusto aron duna siyay magamit pang- eskuyla ingon man ang pagkaon alang sa iyang pamilya.

Samtang ang usa ka retiradong journalist nga Norwegian nga si Harry Wad, 50, lima ka tuig na nga nagpuyo dinhi sa Sugbo ang mitabang ‘sab sa maong kalihokan pinaagi sa paghatag og mga t-shirt ug mga ice cream. “This is my country now, its been fun to watch these kids to be happy in times of Christmas and one way also for them not to be afraid to the police,” sigun  pa ni Wad sa Banat News.

Gitug-an ni Belciña nga mapun-an pa ang grasya sa maong mga bata human nga miingon ang OIC Chief sa CCPO nga si Sr. Supt. Conrad Capa nga ang matag bata nga i-adopt sa matag police official kinahanglan nga ilang suportahan hangtod nga makahuman og pagtungha sa elementarya.

Gipasabot ni Belciña nga ila kining gibuhat aron mapabati sa mga bata ang diwa sa Pasko ug lantawon nila ang mga polis nga dili kahadlokan. – /EIM) (BANAT NEWS)