Australyana nanghasi sud sa mall

CEBU, Philippines – Usa ka Australyanang babaye ang gisikop human kini nanghasi sulod sa usa ka salon sa Ayala Center Cebu niadtong Domingo sa hapon diin apil nga naigo ang mabdos nga kahera atol sa pagpamundak ug pagpanghasi niini.

Ang mga nangaangol nga empleyado sa usa ka salon buot unta nga mopasaka og kasong Slander by Deeds and Damage to Property batok sa Australyanang si Denisse Stephanie Campos, 25, nga nagpuyo sa Perth, West, Australia.

Apan kasamtangang nagpuyo sa 305 Dama de Noche, Green Hills Subdivision, sa siyudad sa Mandaue. Tungod sa iyang gibuhat, gisikop siya sa duha ka security guard sa maong mall nga sila si S/G Rolan Balat ug S/G Ezer Villabriell.

Sumala pa nga nanghasi ug gitulisok ni Campos ang nawong sa branch manager sa maong salon nga si Jessy Joy Pasquire, 32, taga A. Lopez Street, Calamba ug pagkahuman gilabay niini og botelya sa softdrink sa likod.

Apil sa naangol ang usa sa mga empleyada sa salon nga si Janine Antojado nga gikawras ni Campos sa liog ug ang mabdos nga kahera nga si Mary Grace Baguio, 29. Matud pa nga naigo ang gisabak ni Baguio dihang gipusdakan kini sa suspek og hardbound nga libro.

Si Police Officer 2 Villarando Bacalso mibutyag nga ang wa pagkasinabtanay sa presyo sa pipila ka mga serbisyo sa maong salon ang hinungdan nganong miulbo ang kalagot sa maong langyaw ug nanghasi.

"Nagkasabot na man unta to sila nga 3,500 pesos ang presyo sa unsa ‘to nila nga (beauty) service apan nahibulong ni siya (langyaw) nga daghan na man kaayong additional nga bayad hangtud naabot na'g 4,500 pesos. Mao ‘to nga nagkalalis tingali sila," sigon ni PO2 Bacalso. Gitanggong og kadiyot ang langyaw sa Mabolo Police Station aron unta pasakaan og kaso apan gibuhian ra ‘sab human giingong nagkaareglo ang duha ka kampo. – /EIM) (BANAT NEWS)