285 cellphones
CEBU, Philippines – Dul-an 300 ka mga cellphones ang nasakmit gikan sa mga piniriso sa Cebu Provincial Detention and Rehabilitation Center (CPDRC) karong tuiga.
Mokabat og 285 ka mga cellphones, chargers ug uban pang electronic devices gipresentar ngadto kang Gobernador Hilario Davide III kagahapon.
Matud pa ni Romeo Manansala, Jail Warden sa CPDRC nga nasakmit nila ang maong mga cellphones sa operation greyhounds ug inspeksyon sa mga selda. Ang pagbaton og cellphones ug uban pang electronic gadgets usa sa labing bug-at nga kalapasan sa patakaran sa CPDRC.
Apan duna hinuoy uban nga miboluntaryo pag-turnover sa ilang cellphones. Atol sa gihimong inspeksyon sa Women’s Dormitory sa CPDRC, adunay 20 ka cellphones nga nakuha niadtong Huwebes, apan human sa pag-awhag kanila nga i-turnover ang ilang mga cellphones, 60 ka buok ang boluntaryong gitahan sa mga priso nianang Biyernes.
“Amo man silang gikumbinser nga i-surrender gyod. Kay bisan sige mi og round naa man gyod di makit-an,” sigon ni Manansala.
Matud pa ni Manansala, bartolina gikan usa ka semana hangtud usa ka buwan ang padulngan sa si bisan kinsang priso nga masakpang dunay cellphone sa sud sa CPDRC. Gibutyag ni Manansala nga pipila sa iyang mga jailguards ang nakadawat og mga hulga gikan sa mga priso pinaagi sa text. Gawas sa mga operation greyhounds, duna say mga cellphones nga nasakmit sa pagrekisa sa mga priso nga gikan pa nitambong og hearing sa ilang mga kaso sa korte.
Tungod sa maong mga gadgets, gusto ni Manansala nga makabaton ang pasilidad og duha ka cellphone signal jammers aron mawala nay kapuslanan ang mga cellphones nga hangtud karon wala pa masakpi. – /EIM) (BANAT NEWS)
- Latest
