Gipasidunggan

CEBU, Philippines - Ang kagamhanan sa probinsiya sa Sugbo pinaagi sa Provincial Veterinary Office (PVO) mipasidungog sa lima ka outstanding local artificial insemination (AI) technicians sa lainlaing lungsod.

Ang gipasidunggan mao sila si Bobby Aledon (Asturias), Leonito Manzanades (Argao), Edwin Dotillo (Borbon), Victoriano Lañojan (Sibonga) ug Isagani Trinidad (Barili).

Ang lima ka awardees naka-produced og 785 ka AI offspring diin ang value niini gibana-banang dili moubos sa P11.7 milyones.

Si Manzanades nga kanhi kapitan sa Barangay Apo, Argao ug presidente sa Artificial Insemination Practitioners Association of Cebu mihulagway sa ilang trabaho nga dili sayon.

Si Nenita Jaganas, hepe sa Animal Production Division sa PVO nagkanayon nga ang mga awardee gawas nga nakuha nila ang target gikan sa buwan sa Enero hangtud sa Oktubre niining tuiga, nakuha usab nila ang outstanding performance level base sa standard nga gitakda sa Civil Service Commission.

Ang matag AI technician gihatagan kini 12 ka serbisyo matag buwan isip ilang monthly target, pito ka momabdos nga baka o kabaw. (BANAT NEWS)