Tulo patay sa aksidente

CEBU, Philippines - Tulo ang patay sa tulo ka managlahing aksidente sa kadalanan nga nahitabo sa probinsiya sa Sugbo niadtong nakalabay nga adlaw. Sa lungsod sa Asturias, usa ang patay samtang tulo ang angol human nagbangga ang duha ka motorsiklo sa Barangay Tubigagmanok.

Ang namatay mao  si Nelson Perales, 33, samtang sakay sa gikabangga niini nga motorsiklo sila si Felipe More, 32,  kinsa adunay duha ka pasahero niadtong tungora.

Matud pa ni Police Officer 2 Excel Aguanta ang desk officer sa Asturias Police Station nga nahinabi sa Banat News, paingon sa barangay Sta. Lucia si More kauban ang usa ka maestra aron mamista.

Apan nasugatan niini ang motor ni Perales nga bag-ohay lang mi-overtake sa gisundang traysikol hinungdan sa panagbangga.

Daling gidala sa Balamban District Hospital si Perales apan nakabsan kini sa kinabuhi, samtang si More nakaangkon ‘sab og mga bun-og ug pangos sa iyang mga lawas ug ang duha ka pasahero niini

Sa Daanbantayan, patay ‘sab ang usa ka 64 anyos nga si Lydia Coyoca human kini nabanggaan og jeep pasaheroan sa National Highway sa Barangay Malingin.

Ang drayber sa Fuso Canter nga nakadasmag kaniya mao si Efren Chin nga paingon sa barangay Bagay dihang  nadasmagan niini ang biktima nga gikatahong kalit lang mitabok sa kalsada.

Laing aksidente usab ang nahitabo sa Balamban nga miresulta sa kamatayon ni Jason Adolfo, dihang nakabanggaanay niini ang laing motorsiklo  diha sa Barangay Pondol.

Samtang naangol usab ang nakadasmagay niini nga si Dennis Cabelara, 24, Erwin Alisoso, 24, ug Nelson Cervantes.

Nasayran nga paingon unta sa habagatan si Adolfo apan pag-abot niini sa maong lugar kalit lang nagbangga ang duha ka motorsiklo. (BANAT NEWS)