Manager nagpusil sa ulo namatay

CEBU, Philippines - Gumikan sa problema sa iyang trabahoan, usa ka manager sa usa ka sikat nga fastfood chain ang gituohang naghikog  pinaagi sa pagpusil sa iyang ulo sa sulod sa ilang panimalay sa  Florida County Subdivision, Dumlog dakbayan sa Talisay, niadtong nakalabay nga gabii.

Ang naghikog patay naila nga si John Paul Basallo, 35, kinsa matud pa dunay problema sa iyang trabahoan. Matud pa ni Senior Police Officer 1 Benjamin Sebellita, ang imbestigador sa Homicide Section sa Talisay City Police nga nahinabi sa Banat News nga ang mismo ang asawa ni Basallo ang mitug-an nga duna’y problema ang iyang bana sa iyang trabaho. Buntag sa adlaw nga Sabado gihatod pa ni Basallo ang iyang asawa sa trabahoan niini aron mutambong sa Christmas party apan matud pa wala mo-duty si Basallo ug mi-text nga basin di na kini maka-text pagbalik. Dihang nauli na ang asawa nga si Liezel nianang pagkagabii wala’y misanong sa iyang tawag gikan sa gawas mao nga mikatkat na lang kini sa paril aron makasud.

Apan nakurat siya pagsulod sa ilang kwarto dihang nagbuy-od na sa ilang lawak ang bana ug naligo na sa dugo samtang nagkupot og .38 revolver. Dali pa unta nga nakapangayo og tabang ang asawa sa ilang mga silingan apan patay na kini.

Sumala pa ni Sebellita nga wala’y nakadungog sa mga silingan sa buto sa armas tungod kay sirado kaayo ang balay.

Gipaabot pa ang resulta sa awtopsiya aron pagtino kun way foul play sa kamatayon niini.  (BANAT NEWS)