Duha girapido patay
CEBU, Philippines - Patay ang duha ka lalaki human girapido sa sitio Bonbon, Ocaña, dakbayan sa Carcar pasado alas 8 sa niaging gabii.
Ang mga biktima naila nga sila si Joseph Abella, 44, ulitawo ug si Ronnie Tagimacruz, 35, pareho nga nagpuyo sa maong barangay.
Matud ni Supt. Teodulfo Manatad III, hepe sa Carcar Police Station, nga samtang naglingkod-lingkod sa gawas sa balay ang duha kalit lang niabot ang duha ka lalaki nga armado ug unang gipusil si Tagimacruz ug gisunod si Abella.
Human sa pagpamusil giduol pa sa usa sa mga gunmen si Tagimacruz ug gitiwasan.
Dali pa unta nga gidala sa Carcar Provincial Hospital ang duha ka biktima apan patay na nga naabot gumikan sa igo sa ulo ug sa kalawasan.
Usa sa gisubay sa kapolisan kung igo lang ba nga napagan si Abella human giingong si Tagimacruz lang ang tuyo sa duha ka gunmen.
Giingong bag-o pa lang nakagawas sa prisohan si Abella samtang nabilanggo na sab sa Carcar Police si Tagimacruz human kini nangulata sa iyang ka live-in.
Apan gitug-an ni Manatad nga posible sab nga drugas ang hinungdan sa pagpamusil nunot sa kalambigitan sa duha sa maong kalihukan. Ang duha ka gunmen nakit-an pa unta sa inahan ni Abella apan wala na maka-klaro sa dagway gumikan sa kangitngit.
Matud ni Manatad nga duna gyu’y dakung kasuko ang mamumuno ug wala na’y tuyo nga buhion pa ang duha ka biktima.
Nakuha sa crime scene ang lima ka basiyo sa bala sa .45 pistol, duha ka basiyo sa shotgun, duha ka slug sa bala ug usa ka bala sa shotgun. (BANAT NEWS)
- Latest
