Gisilawan sa suga, polis nanumbag
CEBU, Philippines – Gisukmag sa usa ka Police Public Safety Company Officer ang 19-anyos nga lalaki sa sitio Toril, Canjulao dakbayan sa Lapu-Lapu tungod sa high beam sa siga sa suga sa motorsiklo niadtong Lunes sa gabii.
Matud ni PO1 Benhur Cuadra sa Gun-ob Police Station, nga nireklamo si Julito Wahing, taga Purok Judas Belt, Babag 2, kinsa nilabay sa sitio Toril, Canjulao pasado alas 9 sa gabii samtang si PO1 Teodoro Pebida nagtindog daplin sa dalan. Base sa imbestigsyon nga gikan namisita sa uyab si Wahing ug kalit nga misinyas si Pebida nga pahunungon sa iyang gisakyan nga motorsiklo.
Giingong kalit gisumbag si Wahing sa ulo sa makatulo ka higayun ug kausa sa iyang likod dayun gibuak sad sa polis ang helmet hinungdan nga nisumbong kini siya sa iyang inahan ug nidangop sa kapolisan.
Niadtong higayuna gihulagway ni Wahing nga wala nagsul-ob og uniporme si Pebida ug kaila sab siya sa polis kinsa amigo sa iyang uyoan nga si Rey Lyndon Lawas, kanhi hepe sa Lapu-Lapu City Police Office, ug karon hepe sa Regional Investigation and Detective Management Division sa PRO-7.
Gikompirmar kagahapon ni Sr.Supt. Armando Radoc, officer-in-charge sa LLCPO ang gihulagway ni Wahing ug niingon nga ni-absent si Pebida sa wala masayri nga rason nga unta duty man siya alas 8 sa gabii hangtud sa alas 8 sa buntag sa City Hall Compound.
Si Radoc niingon nga gipaubos si Pebida sa drug test apan negatibo ang resulta. Kasamtangang gitanggong si Pebida sa Gun-ob Police Station diin nipasaka og kasong slight physical injury ug malicious mischief ang biktima batok sa suspek.
Si Radoc niingon nga kasong grave misconduct ang ipasaka batok kang Pebida kinsa upat na ka tuig sa serbisyo ug ipaubos kini sa camp restriction.
Dugang ni Radoc nga magsilbi kining leksyon sa kapolisan ang insidente isip paghatag og disiplina. – /GMR) (BANAT NEWS)
- Latest
