Misa de Gallo adto sa kalungsoran
CEBU, Philippines – Martes sunod semana magsugod na usab ang siyam ka Misa de Gallo, nobenaryo sa dili pa ang pagsaulog sa pagkatawo sa batang si Jesus.
Si Cebu Archbishop Jose Palma mobiyahe g’yud aron sa pagpahigayon sa siyam ka Misa de Gallo sa mga lugar gawas sa siyudad sa Sugbo.
Sa unang adlaw sa Misa de Gallo, ang arsobispo mopahigayon og santos nga misa sa parokya sa Barangay Manlapay, Dalaguete.
Gipasabot ni Archbishop Palma nga kasagaran sa mga simbahan sa siyudad sa Sugbo ug sa silingang mga siyudad siya mopahigayon Misa de Gallo. Lakip sa duawon ni Palma ug pahigayonan sa simbang gabi mao ang pipila ka mga parokya sa Northern Cebu, ilabi na kadtong mga naapektohan sa bagyo’ng Ruby.
Hinoon, ini’g petsa Disyembre 17, si Palma mopahigayon sa Misa de Gallo sa Cebu Catholic Television Network (CCTN) compound.
Awhag ni Palma sa publiko nga sa pagsugod na usab sa simbang gabi sunod semana, unta mapasalamaton kita sa Diyos alang sa tanan ug padayonon ang pagtambong sa mga simbang gabi.
Panawagan usab niya nga sa pagtambong sa mga misa de gallo mas lig-onon pa nato ang atong pagdebosyon ngadto sa inahan sa bata’ng Hesus nga si Birhen Maria ug mismo sa labaw’ng makakagahom.
Samtang, sa dili pa moadto sa Dalaguete si Palma, adunay ipahigayon nga recollection ang Arsobispo alang sa mga sakop sa media, kapolisan ug uban pa’ng mga layko sa Archbishop Palace unya sa Lunes sa buntag. – /RUB) (BANAT NEWS)
- Latest
