Mga PWD’s malipay ugma
CEBU, Philippines – Ang kadagkoan sa Cebu City Hall mihukom na g’yud nga ang ‘tag P10 mil nga bonus alang sa mata’g opisyal ug kawani sa dakbayan ipanghatag na karong Desiyembre 16, samtang ang mga Persons with Disability (PWD) hatagan na usab og ‘tag P3 mil ugma na’ng adlawa.
Kapin sa 4,200 ka kaswal ug regular nga kawani sa City Hall mao ra ang makadawat og ‘tag P10 mil nga bonus, walay labot ang mga contractual ug ang mga job-order employees.
Sa miagi’ng tuig ang mga opisyal ug kawani sa City Hall nakadawat og ‘tag P20 mil nga pinaskuhan apan gibutang lang nga “calamity financial assistance” apan ang kuwarta wala kuhaa gikan sa calamity fund.
Ang P3 mil nga ipanghatag sa matag usa ka accredited nga PWD dinhi sa dakbayan maoy maghingpit sa ilang P5 mil nga cash assistance para karong tuiga. Sayo ning tuiga, nahatagan na ang mga PWD og ‘tag P2 mil.
Si City Treasurer Diwa Cuevas miawhag sa kapin sa 9,000 ka PWD nga mosayo sila pag-adto sa ilang mga barangay hall aron pagkobra sa ilang cash assistance.
Sa laing bahin, si Cuevas miingon nga giandam usab niya karon ang duha ka payroll alang sa pagpanghatag og cash assistance sa mga senior citizens.
Ang usa ka payroll ‘tag P3 mil samtang ang laing payroll ‘tag P2 mil. Matud ni Cuevas nga anaa ra ni Mayor Michael Rama ang paghukom kun asa sa duha ka payroll ang iyang pirmahan.
Sigurado na nga dili mahurot og hatag ang nahabilin nga P5 mil nga cash assistance sa mga senior citizens karong tuiga. – / RUB) (BANAT NEWS)
- Latest
