Palma nagpasalamat sa katawhan

CEBU, Philippines – Nagpasalamat si Arsobispo Jose Palma sa katawhan sa pagtinabangay atol sa bagyong Ruby.

Kini atol sa iyang wali sa misa sa piyesta sa Immaculada Concepcion sa Metropolitan Cathedral kagahapon.

Nagpasalamat si Palma sa Labing Makagagahum nga nihunong ang uwan kagahapon sa hapon ug nagpakita ang haring adlaw aron saulogon sa katawhan ang piyesta ni Mama Mary.

Sigun ni Palma nga ang paghunong sa uwan matandi sa paglikay sa kadaut sa bagyong Ruby kini timailhan nga ang katawhan angayan mobangon sa nagkadaiyang kalamidad nga migusbat sa Kabisay-an. Gitataw ni Palma nga bisan sa kadaut nga nahitabo sa Sugbo daghan gihapon ang angay ipasalamat ilabi na ang pagtinabangay sa oras sa kalamidad. "Taliwala sa  mga butang nga nagdala og kasubo kita angay magpasalamat ug malipay kay anaa ang Ginoo nga nagbangon kanato kung daghan ang sala ang grasya naglabi usab," matud ni Palma.

Dugang ni Palma nga ang mga tawo angayan malipay sa grasya nga ilang nadawat ug dili makalimot pagtabang sa mga pobre ilabi na nga sa sunod tuig gideklarar sa Catholic Bishops Conference of the Philippines (CBCP) nga tuig sa mga kabus. – /GMR) (BANAT NEWS)