Nasunugan ubos na sa state of calamity
CEBU, Philippines - Makadawat og pinansiyal nga hinabang ang 100 ka pamilya sa Mahiga Creek sa sitio Mahusay, Subangdaku, dakbayan sa Mandaue nga biktima sa sunog niadtong Disyembre 4.
Si Roger Paller, public information officer sa dakbayan sa Mandaue, miingon nga ang paghatag og pinansiyal nga hinabang sa mga biktima natigayun human sa special session sa konseho ug gideklarar nga ubos sa state of calamity ang lugar.
Gitigum ni Mayor Jonas Cortes ang mga sakop sa City Disaster Risk Reduction and Management Council ug ilang giaprobahan ang resolusyon nga nagrekomendar isip state of calamity ang nasunugan.
Madawat sa 56 ka tag-iya sa balay ang P10,000 nga hinabang ug P5,000 matag usa sa 44 ka mga nag-abang nga nagpuyo sa maong dapit.
Ang City Social Welfare and Development Services (CSWDS) ang mohimo og pakisusi kun si kinsa ang mahimo nga makadawat og pinansiyal nga hinabang.
Ang mga biktima nga nalakip sa beneficiaries sa socialized housing project sa barangay Paknaan sa maong dakbayan dili na tugutan sa pagtukod og balik sa ilang mga panimalay.
Si Subangdaku Barangay Kapitan Ernie Manatad miingon nga ang mga panimalay nga nahimutang sa pribadong luna ang posible pa nga makabalik tungod kay mag-agad man kini sa kabubut-on sa tag-iya. (BANAT NEWS)
- Latest
