M.J. Cuenco Avenue gipalapdan na

CEBU, Philippines - Nagpadayon ang Department of Public Works and Highways (DPWH) sa pagpalapad sa M.J. Cuenco Avenue gikan sa eskena sa Cebu Business Park paingon na sa Barangay Mabolo.

Kadaghanan sa mga tag-iya og private property nga nahimutang daplin sa karsada miuyon na nga ibanan ang ilang yuta aron himuon nga kabahin sa karsada sa tumong nga masulbad ang problema sa trapiko sa mao nga dapit.

Ang matag kilid sa kaniadto hagip-ot kaayo nga karsada gipang-ibanan og duha ka dupa ug gisugdan na pagbutang og aseras aron kaagian sa mga tawo nga maglakaw.

 Aduna pa hinuo’y pipila ka tag-iya og property nga wala dayon mouyon nga gamiton nga karsada ang ilang balay kun dili makabayad ang DPWH sa kantidad nga ilang gusto’ng ibayad kanila.

Ubos sa balaud kun dili magkauyon ang kagamhanan ug ang tag-iya sa yuta nga gamiton nga karsada, ang hukmanan maoy magmugna og committee aron mohukom kun pila ang tukma nga kantidad.

Ang pagpalapad sa mao nga karsada maoy usa sa gidemanda ni Mayor Michael Rama aron nga matukod ang flyover nga anha ibutang sa eskena sa Barangay Caretta.  (BANAT NEWS)