Kapolisan nanghatag og typhoon safety tips

CEBU, Philippines - Nanghatag og mga typhoon safety tips flyers ang Police Community Relations sa Cebu City Police Office sa mga tawo diha sa mall, simbahan, terminals ug kadalanan kagahapon.

Si Chief Insp. Enrique Belciña ang hepe sa PCR miingon nga mahinungdanon ang unod sa maong tips nga matud pa makaluwas ni bisan kinsa tungatunga sa bagyo. Giawhag ‘sab ang katawhan nga likayan ang pag-ubog sa mga baha aron malikay sa mga sakit sa tubig sama sa leptospirosis  nga kagaw gikan sa ihi sa ilaga nga nakapatay na og daghang kinabuhi. Samtang ang director sa kapulisan sa Police Regional Office-7 Chief Superintendent Prudencio Bañas mimando sa mga sakop nga ipahiluna daan ang ilang mga pamilya sa luwas nga lugar aron di sila mabalaka sa ilang pagresponde.

Sa laing bahin, ang Regional Director sa Department of Environment and Natural Resources (DENR-7) Isabelo Montejo mipagawas og direktiba sa PENRO ug CENRO nga makig-alayon sa mga mayor kalabot  sa himuong pruning sa mga kahoy.

Gipahibalo sa DENR nga base sa Geo- Hazard Threat Advisory nga ilang gipagawas dunay kapin sa usa ka gatos ka barangay sa Central Visayas ang landslide ug flood prone areas. Ang Public Information Officer sa DPWH-7 Marie Nellama miingon nga duna na silay team nga giandam ug usa sa ilang gitutukan mao ang paghawan sa kadalanan kun dunay mga mangatumba nga kahoy ug poste. (Jojo Ugdol ug Decemay P. Padilla/EIM)(BANAT NEWS)