Naghuramentado napatay
CEBU, Philippines - Patay ang usa ka lalaki kinsa giingong naghuramentado ug namusil ug nanigbas sa lima ka mga tawo sa Sitio Artiwi, Barangay General Climaco dakbayan sa Toledo.
Giila ang namatay nga si Felipe Catubis alyas Liclic gibanabana nga 30-anyos, residente sa nahisgutang lugar.
Base sa imbestigasyon sa kapulisan sa Toledo City Police Station nga nanghasi si Felipe sa iyang mga kaliwat ug kalit kining namusil ug nanigbas. Ang napusilan ug natigbasan ni Felipe mao ang iya rang upat ka mga paryente nga sila si Mary Chris, 22, Marcelo Capacite, 45, Marlene Sagumi, 19, ug Merlina Sagumi, 42. Matud pa nga kaadlawon dihang miadto ang suspek sa ilang mga balay nga dunay gipangita, apan ang matag makaatubang niya iyang gipamusil ug gipangtigbas. Wa na kini maabti sa mirespondeng mga tanod ug polis.
Daling gitabang ang mga biktima ug gidala sa Toledo City Hospital apan gibalhin ra usab sa tambalanan sa dakbayan sa Sugbo.
Apan pagkagabii miadto kini sa balay sa usa ka Angie Suico,31, aron moinom og tubig apan human makainom kalit lang nibunot si Felipe og armas ug gipusil si Suico, suwerteng mikagar ang armas ug nakahigayon og layog si Suico kaniya hangtud nga misangpot sa ilang tinigbasay. Dihang nasamdan si Suico misibog kini apan ang asawa na usab niini maoy gipuntariya sa suspek hinungdan nga mibalik siya sa agi ug nakapunit og sangkol ug gisangkol ang suspek hangtud nga kini namatay. Mitahan sa kapulisan si Suico human sa hitabo. (Raymond Abarcas/EIM)(BANAT NEWS)
- Latest
