Alayon nanghunaw merkado di matukod

CEBU, Philippines - Dili angayan basolon ni Talisay City Mayor Johnny De los Reyes ang mga konsehal nga sakop sa Alayon kung dili matukod ang tulo ka andana nga merkado publiko sa Tabunok.

Kini ang pamahayag sa taga Alayon nunot sa pasangil batok kanila nga sila ang hinungdan nganong wala nila hatagi og katungod si De los Reyes nga makautang og P350 milyones sa Development Bank of the Philippines.

Sa 11 ka sakop sa konseho, pito ang anaa sa Alayon nga sila si Richard Francis Aznar, Doroteo Emit, Socrates Fernandez, Edward Alesna, Antonio Bacaltos, Raul Cabañero ug Eduardo "Digul" Gullas III samtang upat ang kaalyado ni De los Reyes. Si Aznar, kinsa maoy majority floor leader, namahayag atol sa press conference kagahapon nga ang mayor ang angayang basolon.

"What we are asking is the feasibility study. Ang feasibility study, wala pa nahuman, giusab-usab, dili pa gyud tukma," matud pa ni Aznar.

Ang giduso nga feasibility study ni De los Reyes giingong wala matukma sa unang gisabotan nga 3-storey ug nahimo na lang 2-storey.

Dason ni Emit nga ang desinyo wala matukma ug gilapas ang kasabutan nga dunay konsultasyon ngadto sa publiko. Dugang ni Emit nga wala maapil sa panagsabot ang mga lider sa market vendors sa Tabunok.

Si kanhi mayor ug kasamtangang konsehal Fernandez mitug-an nga dunay mitanyag nga kontraktor nga maoy motukod sa merkado nga nagkantidad lang og P50 ngadto sa P60 milyones.

"Ang utangon sa mayor nga P350 million dako ra. Ang atong binuwan nga amortization kapin kun kulang P4 ka milyon," matud ni Fernandez.

Dugang pa sa kanhi mayor ang kita sa merkado miabot lang og P600,000 ang matag buwan.

 "Talisaynon, ang grupo ni JVR nga nagdamgo sa dakung income sa bag-ong three storey market, usa ka panganud nga dali rang ibanlas sa hangin sa kapakyas.

Ayaw pagpangahas pag-gasto nga labaw sa tinuod mong kinitaan," matud pa sa statement nga gipagawas sa taga-Alayon. (BANAT NEWS)