Nagduwa nahagbong sa dagat patay
CEBU, Philippines - Gituohang nalumos ang usa ka mananagat nga napalgan nga patay na nga naglutaw sa dagat sa Dunggoan, dakbayan sa Danao.
Si PO3 Arnold Labine sa Danao City Police Station miila sa namatay nga si Daniel Loca Morales, 23-anyos nga taga barangay Sabang sa maong dakbayan.
Matud ni Labine nga si Morales maoy kauban sa grupo sa mga batan-on nga nagduwa og basketball alas 9 pasado ang takna sa Lunes sa gabii sa barangay Sabang.
Ang baskeball court nahimutang daplin sa dagat.
Dugang pa ni Labine nga atol sa duwa, nalagpot ang bola ngadto sa dagat dungan ang pagkahagbong ni Morales.
Nunot sa pagkahagbong sa biktima ang mga kauban nangita apan wala na nila igkita hinungdan sa ilang pagpangayo og panabang sa mga molupyo sa lugar.
Si Labine miingon nga alas 7 na pasado sa pagkasunod adlaw nga milutaw ang patay’ng lawas nga gianod ngadto sa sitio Dancar, Dunggoan nga napalgan usab sa mga mananagat. (BANAT NEWS)
- Latest
