Lola patay, polis angol sa aksidente
CEBU, Philippines - Patay na’ng nadangat sa Toledo City Hospital ang 78-anyos nga lola human dasmagi og pribadong sakyanan sa barangay Sangi sa maong dakbayan.
Giila ang biktima nga si Leonila Trocio, biyuda nga nagpuyo sa nahisgutang dapit. Base sa imbestigasyon sa Toledo City Traffic Section nasayran nga samtang naglakaw ang biktima sa karsada nasaghiran sa sakyanan nga gimaneho sa usa ka Rigolo Restauro, 49-anyos nga taga barangay Media Once, Toledo. Nabagnos ang tiguwang sa karsada hinungdan nga dali kining gitabang ug gidala sa tambalanan.
Nakaangkon og grabeng bun-og ug samad sa kalawasan ang biktima ug pipila ka oras ang nakalabay nakabsan gyud sa iyang kinabuhi.
Mitahan ang suspek sa kapolisan ug gikustodiya na sa Toledo City Police Station.
Samtang grabeng naangol ang usa ka polis human nasungag ang giluwanan niyang motorsiklo sa gikasugat nga taxi sa unang Mandaue-Mactan Bridge habig sa dakbayan sa Mandaue alas 11 pasado ang takna sa niaging gabii. Si PO2 Modesto Lutchavez, field investigator sa Traffic Division sa Mandaue City Police Office (MCPO), miila sa biktima nga si PO1 Michael Singson, 28-anyos, sakop sa Cebu City Police Office.
Matud ni Lutchavez nga gimaneho ni Jesson Alesna, 31, nga taga dakbayan sa Toledo ang KEN Taxi nga nagdala sa plate number GCH 879 paingon sa dakbayan sa Lapu-Lapu. Nagpaingon sab sa dakbayan sa Mandaue ang motorsiklo nga giluwanan ni Singson apan dihang nahidangat sa dulhugon kalit lang nga gikasungag sa gikasugat nga taxi hinungdan sa iyang pagkatumba.
Ang Accident Control and Emergency Response Team (ACERT) ang dali nakadala sa biktima sa Chong Hua Hospital sa dakbayan sa Sugbo.
Si Alesna nitahan sa kapolisan ug kasamtangang gitanggong alang sa tukmang lakang nga ilang pagahimoon. (BANAT NEWS)
- Latest
