Pabuto sa opon gi-regulate

CEBU, Philippines - Ipaubos sa seminar ang mga mamaligya ug mamuhat og pabuto sa dakbayan sa Lapu-Lapu karon nga nagsingabot na ang Pasko.

Ang dakbayan sa Lapu-Lapu usa sa naila sa Sugbo diin buhata ang mga pabuto.

Si Superintendent Oscar Mayol, Lapu-Lapu City Fire Marshall, miingon nga dunay gitakda nga seminar alang niadtong mga mamaligyaay ug mangbuhatay og pabuto.

Kapin na sa usa ka gatos ang mikuha og permit sa ilang buhatan nga usa sa mga gikinahanglan sa mga manufacturers ug retailers sa mga pabuto.

Gihulagway ni Mayol nga kinahanglan gyud nila i-regulate og maayo ang pagpamaligya og pabuto diin ang lugar nga pwede lang tindahan mao ang gikan sa eskina Canjulao hangtud na sa utlanan sa barangay Babag ug lungsod sa Cordova.

Niadtong buwan sa Agosto, ang kapolisan nipahigayun og seminar alang niadtong mga firecrackers retailers ug manufacturers.

Ang mga nitambong  gihatagan og certificate ug kini ang usa sa rekisitos aron sila mahatagan og permit to display ug ang wala nakatambong sa seminar dili mahimong mamaligya.

I-regulate usab sa kabomberohan ang gidak-on sa stall diin ang sukod niini anaa lang sa 2x3 metros ug 6 metros ang gilay-on sa matag stall.

Ang kapolisan moabag sa Bureau of Fire Protection diin ang masakpan nga dili motuman sa lagda mag-atubang og kriminal nga kaso ug mahimong pasakaan og reklamo sa FESSAGS ug sakmiton ang ilang mga gipamaligya.

Gidili gihapon ang pagbaligya og ilegal nga mga pabuto sama sa Super Lolo ug Goodbye Philippines samtang magsugod ang pagpamaligya sa barangay Babag karong Disyembre 15 hangtud na sa Disyembre 31. (Decemay P. Padilla/GMR)

Seniors sa Toledo hatagan og tag P2,500

Madawat na sa mga senior citizens sa dakbayan sa Toledo ang ilang cash assistance sa dili pa ang Pasko.

Gibutyag ni Konsehal Zosimo Abellanosa nga tag P2,500 na ang madawat sa matag senior citizen sukwahi sa unang gipagawas nga report nga makadawat lang og tag P1,000. Gipahibawo na usab ni Mayor John Henry Osmeña ang mga lider sa matag chapter nga makadawat gyud tanang miyembro sa maong kantidad.

Sa pagkakaron adunay 12,479 ka senior citizens ang anaa sa lista sa Office of Senior Citizens Affairs (OSCA)-Toledo. Gihangop ni Godofredo Villarta, pangulo sa OSCA-Toledo ang lakang sa kagamhanan sa pagdugang sa cash incentives.

Unang nigahin og P11 milyones ang kagamhanan apan nipasar ang konseho og supplemental budget aron idugang sa cash assistance sa mga senior citizens isip pinaskuhan.

Dugang niini giplanohan usab sa dakbayan ang paghatag og P100 mil nga cash incentives sa mga senior citizens nga makaabot sa edad nga 100 o centenarian. (BANAT NEWS)