Davide nangayo’g tabang sa taga Bantayan

CEBU, Philippines - Nangayo og tabang si Gobernador Hilario Davide III sa mga lumolupyo sa lungsod sa Bantayan nga makig-alayon sa kapolisan kun adunay mabantayan nga pag-abuso sa mga menor de-edad.

Ang awhag ni Davide gihimo human nga nadakpan ang usa ka Swedish national nga si Hauck Walter didto sa barangay Talisay, Sta. Fe, sakop sa isla sa Bantayan nga matud pa nakig-uban og menor de-edad sa usa ka panimalay.

Matud ni Davide nga giatiman na karon sa National Bureau of Investigation (NBI), Children's Legal Bureau (CLB) ug Provincial Women's Commission ang beach house sa langyaw nga nadakpan.

Gitan-aw usab ang posibilidad nga apilon pagpasaka og kaso ang ginikanan sa mga  bata nga anaa karon sa Department of Social Welfare and Develepment (DSWD) kun masuta nga gitugotan nila ang dili maayo’ng kalihukan.

"Im asking the community to be vigilant ug motaho dayon kun aduna sila’y mabantayan nga pang-abuso sa kabatan-onan," sumala pa ni Davide. Giangkon ni Davide nga aduna siya’y nadawat nga taho nga dunay mga langyaw nga giingong nagpahimulos og mga menor de-edad sa Bantayan apan iyang gitataw nga gihatagan kini niya karon og pagtagad aron kini mahunong. (BANAT NEWS)