Nagluhod, dihang gipusil atubangan sa anak

CEBU, Philippines - Usa ka kanhi guwardiya ang gipusil patay nga nagluhod atubangan sa iyang 10 -anyos nga anak  diha sa Barangay Lambug, Badian.

Ang biktima naila nga si Romeo Terante, 50, balo, ug nagpuyo sa maong lugar. Sa inisyal nga imbestigasyon sa Badian Police nga gipangulohan ni SPO1 Emmanuel Caballero ug mga kaubanan nasayran nga atol sa pagpamusil kauban ni Terante ang iyang grade 4 pupil nga anak.

Sumala pa nga kalit lang mihunong ang usa ka motorsiklo sa tungod sa duha  ug usa sa sakay niini ang kalit mipusil sa biktima ug naigo sa bukton hinungdan nga mikaratel kini og dagan.

Apan gigukod kini sa gunman ug dihang naapsan gikatahong miluhod ang biktima aron magpakiluoy apan gipusil kini sa nawong kausa ka higayon ug pagkahuman gibiyaan. Patay na kini pag-abot sa Badian District Hospital.

Base sa impormasyon sa mga nakakita sa hitabo nga naka-short kolor itom ang suspetsado, itom sab nga t-shirt, naka-bonnet, medyo itumon ang pamanit ug insakto lang ang gidak-on sa lawas nga sakay sa XRM nga motorsiklo.

Nakuha sa kapulisan sa crime scene ang duha ka basiyo sa bala sa .45 kalibre ug duha ka buhi nga bala niini.

Hangtod karon nagpadayon pa ang imbestigasyon sa Badian Police sa maong hitabo aron pagtumbok sa motibo ug pangalan sa gunman. (BANAT NEWS)