Sinkhole mibutho sa Badian
CEBU, Philippines - Usa ka sinkhole ang mibutho diha sa barangay road sa Barangay Banhigan, Badian kagahapon sa buntag.
Ang maong sinkhole adunay gilapdon nga lima ka metros ug giladmon nga napulo ka metros nga matud pa resulta sa pagsige og uwan .
Si Eddie Llamedo, tigpamaba sa Department of Environment and Natural Resources nagkanayon nga ilaha nang giawhag si Mayor Rubburt Librando nga pabutangan og kordon ang palibot sa sinkhole.
Kun gikinahanglan, ipahiklin una sa mas luwas nga dapit ang mga nagpuyo nga masulod sa 70 ngadto sa 100 metros nga radius gikan sa sinkhole.
Matud ni Llamedo nga posibleng adunay river system ilawom sa maong dapit ug tungod sa pagsige og bunok sa uwan nihumok ang ibabaw nga bahin niini mao nga nahunlak.
Ang maong klase sa yuta gihinganlan og marl nga kombinasyon sa anapog ug lapok nga dali rang tuhopan og tubig.
Ang Mines and Geosciences Bureau-7 miisyu na og “ground subsidence threat advisory” kagahapon sa buntag.
Ang DENR mipahibalo na usab kang Librando sa paghimo og request alang sa ground penetrating radar survey aron sa pagsuta sa giladmon sa sinkhole. (BANAT NEWS)
- Latest
