Rama wa mahadlok sa kiha
CEBU, Philippines - Wala mahadlok si Cebu City Mayor Michael Rama sa gipasaka nga kaso ni kanhi mayor Tomas Osmeña mahitungod sa planong paghimong parke sa Doña Pepang Cemetery.
Matud ni Rama nga igo ra niya gitiwas ang plano sa kanhi mayor sa pagpanindot sa maong sementeryo aron mapreserbar ang historical value niini.
“We don’t intend to destroy everything nor the mausoleum,” matud ni Rama.
Sigun ni Rama wala na natagad ang maong sam-ang ug wala na’y sulod ang mga nitso niini.
Kompyansa si Rama nga dili siya madihado sa kaso tungod sa mga gikuptan nga mga papeles nga nagpamatuod nga orihinal kini nga plano ni Osmeña ug dili iya.
Ang maong sam-ang gipanag-iya na sa dakbayan sa Sugbo pinaagi sa Deed of Exchange nga gipirmahan tali sa Archdiocese of Cebu kinsa maoy tag-iya sa una.
Gihulagway ni Rama si Osmeña nga “carrying his own hammer and hitting in on the nail in his head” tungod sa gihimong pagpasaka og kaso. Pursigido si Rama nga ipadayon ang proyekto human gisirad-an ang sam-ang niadtong Nobiyembre 15. Ang luna dunay gilapdon nga 9,282 metros kwadrado nga nahimutang sa M.J. Cuenco Avenue, Cebu City. (BANAT NEWS)
- Latest
