CHR-7 mosusi sa demolisyon

CEBU, Philippines - Gipasakaan g’yud og kasong obstruction of justice ang secretary general sa Sanlakas nga si Atty. Aaron Pedrosa ug kaso usab nga physical injuries ang gipasaka batok sa iyang sakop nga si Jessica Zuñiga. Ang kaso may kalabotan sa nahitabong kagubot atol sa paghipos sa mga sakop sa siyudad sa Mandaue sa mga gipabarog nga barong-barong sa gihawanan nang tampi sa Mahiga Creek diha sa Sitio Mahayag ug Sitio Mahusay sa Barangay Subangdaku.

Si Pedrosa nga nahinabi sa Banat News mipadayag nga igo lang pagdepensa sa iyang mga kliyente nga giharas sa demolition team.

Gipasabot ni Pedrosa nga kadto lang mga estraktura nga nakalapas sa 3-meter easement zone sa Mahiga Creek maoy demolison.

Matud niya igo ra siyang mipatunga aron di magkagubot apan giapil na hinuon siya sa pagsikop sa mga polis.

Matud niya duna pa sila’y kasong gisang-at sa korte ug gipaabot pa ang pagresolbar niini apan bisan pa niini gipadayon gihapon ang clearing operation. Si Subangdaku Barangay Kapitan Ernie Manatad nga nahinabi sa Banat News miingon nga 300 kapin ang gidemolis apan malinawong namalhin sa relocation site sa Barangay Paknaan.

Ang Commission on Human Rights sa Central Visayas miingon nga abli ang ilang buhatan kung dunay reklamo gikan sa duha ka habig nga mudangop kanila.

Gitug-an ni Atty. Arvin Odron, OIC-Director sa CHR-7 nga una nilang tan-awon ang video clips nga nagpakita sa kagubot nga diin gibunlot sa mga polis ang mga babaye. Gipasabot ni Odron nga atol sa gihimong meeting sa kapulisan ug mga sakop sa clearing team dunay representante sa CHR-7 nga mitambong, sa meeting, napanglantawan nang daan nga posibleng gamitong paon ang kababayen-an. (BANAT NEWS)