Mga bugaw gipapriso sa tibuok kinabuhi

CEBU, Philippines - Tulo ka tawo ang gikombikto ug gisilotang mabilanggo sa tibuok nilang kinabuhi ni Regional Trial Court Judge Bienvenido Saniel, Jr.  tungod sa kalapasan sa  Anti-Trafficking in Persons Act human mamatud-ing tinuod ang mga pasangil batok kanila.

Ang gikombikto ni Saniel mao sila si Marlyn Buhisan ug Marichu Tawi, nga giingong mibugaw og mga babaye aron mobaligya sa ilang dungog, ang duha gimandoan usab nga pabayron og P2 milyones sa korte isip multa.

Gikombikto usab ni Saniel si Antonio Planteras, tag-iya sa New Perlito’s Lodge nga agalon sa duha kinsa giingong mitugot nga gamiton ang maong establisamento  sa maong krimen. Si Planteras gisentensyahan nga mapriso sud sa 15 ka tuig ug pabayron og P500,000 nga multa.

Ang tulo ka mga akusado nadakpan niadtong Abril 28, 2009 sa kapulisan pinaagi sa entrapment operation.

Matud ni Police Officer 3 Jose Erwin Dumaguit nga niadtong ikaduhang semana sa Marso 2009, nakadawat ang ilang opisina og report kabahin sa prostitusyon diha sa New Perlito’s Lodge, mihimo dayon sila og surveillance sa dapit ug dihang nakompirmar ang report gilusad dayon ang entrapment operation.

Human madawat ang kwarta sa mga akusado, dali nga gidakop sa mga kapulisan ang tulo ug naluwas ang upat ka babaye.

 Ang mga biktima matud pa, bayran lang og P300 sa mga suspek.

Ang tulo pulos mihimakak sa mga pasangil kanila.

Apan si Saniel miingon nga base sa ebidensyang gipresentar nasuta nga guilty ang mga akusado. (BANAT NEWS)