Dinakpan gustong mag-lider sa nasud
CEBU, Philippines – Bag-ong kinabuhi ang pangandoy sa usa ka suspek nga napusilan sa kapolisan sa lungsod sa Tuburan kinsa nibunot pa og granada dihang kini gidakop.
Kini ang gipadayag mismo ni Jonald “Empoy” Calaunan, 25, kinsa notadong tigpayuhot og drugas sa maong lungsod.
Matud ni Calaunan nga nanghadlok lang unta siya sa polis nisikop kaniya apan sa dihang nag-ilogay sila sa iyang dala nga granada, aksidenteng naibot ang pin ug nibuto.
Human nakagawas na sa tambalanan si Calaunan, kini nipadayag nga gusto na niyang mabag-o ang iyang kinabuhi.
Gani gusto pa niya nga mahimong lider sa nasud aron iyang mahimo ang iyang gusto nga kausaban. “Kuan lang akoa mahimo kung usa ka leader, gusto ko og kausaban, akong idol si Noynoy,”sigun sa dinakpan.
Si Calaunan nagpa-tattoo og krus sa iyang abaga kay gusto sab mahimong Ginoo.
Kasong pagpayuhot og ginadiling drugas ug frustrated murder ug frustrated homicide ang atubangon sa suspek kinsa nagtingkagol na sa Tuburan Police detention cell. – /GMR) (BANAT NEWS)
- Latest
