Citi Center pay parking na
CEBU, Philippines – Giablihan kagahapon ang nabakanteng luna nga kanhi nahimutangan sa Citi Center sa barangay Kamagayan, dakbayan sa Sugbo isip pay parking area.
Dul-an usa ka ektarya ang gihawanan sa mga kawani sa Prevention, Restoration, Order, Beautification and Enhancement (Probe) sa maong dapit ug 3,814 metro kwadrado ang gigahin alang sa gihimong pay parking.
Ang pay parking area dumalahon sa barangay Kamagayan hangtud dili pa masugdan ang tukuron nga condominium.
“Ang income ani ari usa sa barangay. Naa mi MOA sa mayor nga ang barangay usa’y modumala aning parkingan,” matud ni Kapitan Raquel Avila.
Matud ni Avila nga gibana-banang moabot sa 50 hangtud sa 80 ka mga sakyanan ang maarang sa parkingan.
Ang matag sakyanan magbayad og P20 alang sa unang oras ug P10 sa mga sunod nga oras sa pag-parking.
Abli ang parkingan gikan alas 6:00 sa buntag hangtud alas 8:00 sa gabii samtang tun-an pa sa barangay kung himuon ba’ng 24-hours ang pag-operate sa parking area.
Buot ni Mayor Michael Rama nga ma-account og sakto ang tanang kita sa pay parking alang sa transparency.
Plano ni Rama nga tukuran ang maong dapit og duha ka condominium alang sa qualified nga mga residente sa Kamagayan ug ang usa alang sa mga kawani sa City Hall.
Giguba ang edipisyo sa niaging Agosto aron han-ayon ang mga namuyo nga ningkabat sa 147 ka pamilya samtang 108 kanila ang nakabalik pagpuyo. – /GMR) (BANAT NEWS)
- Latest
