Human sa snow-storm baha na ‘SAB
CEBU, Philippines - Human sa snow-storm nga nakapatay og katorse ka tawo sa Amerika, ang grabeng pagbaha na usab maoy hulga karon sa kinabuhi sa mga residente sa Buffalo, New York tungod kay nagkaanam na og kahilis ang snow.
Ang kasadpang bahin sa New York nalubong sa kapin unom ka tiil nga snow ug kini hinayhinay na og kahilis tungod sa pagsaka na sa temperature sa lugar sumala pa sa National Weather Service sa report sa Agence France Presse.
Tungod niini, miisyu ang NWS og flood warning sa tanang mga residente aron sila makapangandam sa posibleng mahitabo.
Ang warning gipatuman na sa amihanang Erie, Genessee, Wyoming, Chatauqua, Cattaraugus, habagatang Erie counties, nga naglakip sa Buffalo, Batavia, Warsaw, Jamestown, Olean, Orchard Park ug Springville.
Gibanabanang maapektahan sa maong pagbaha ang 600,000 ka mga namuyo sa maong mga dapit, gani kadaghanan kanila pabilin pang na-trap sa ilang mga balay tungod sa snow.
Tungod niini, gimando sa mga awtoridad nga pahawanan nang daan ang ilang mga kanal sa atubangan sa ilang mga balay ug ibutang sa mas taas nga bahin sa ilang balay ang mga importanteng mga gamit aron di mabasa kun mahilis na ang snow.
Samtang gidid-an na sa National Guards ang pipila ka mga lugar nga dunay magbiyahe tungod sa peligro. (BANAT NEWS)
- Latest
