Katungod sa estudyante

CEBU, Philippines - Ang Student Councils Alliances of the Philippines (SCAP) mihimo’g lakang aron kaprotehean ang katungod sa mga tinun-an sama sa kalit nga pagpausbaw sa tuition fees.

Si Hendy Abendan sa SCAP mibutyag nga usa sa problema sa mga estudyante ug mga ginikanan mao ang kalit nga pagpausbaw sa bayranan sa mga eskuylahan.

Matud ni Abendan nga ang ubang eskuylahan mopatuman og dili makatarunganon nga pagpataas sa ilang tuition fee ug gani dili kini makahatag og break down aron masubay sa mga estudyante kun unsa ang ilang gipangbayaran.

Gipasabot ni Abendan nga angayang ibutang sa tunghaan ang rason nganong mipausbaw sila og tuition fee aron masuta kun makiangayon ba ang ilang gipangayo.

Ang ubang eskuylahan walay student council ug wala’y student handbook mao nga ang mga tinun-an dili makahibalo sa mga “rules and regulations” sa tunghaan ug matingala na lang nga ipatawag tungod kay giingong adunay nabuhat nga kalapasan.

Ang SCAP nagpahigayon na karon og kampaniya alang sa katungod sa mga estudyante dinhi sa dakbayan sa Sugbo aron ang mga opisyal sa siyudad makagama og balaod niini.

Matud ni Abendan nga bisan og wala pa maaprobahi sa nasudnon nga kagamhanan ang balaod alang sa katungod sa mga estudyante buot nila nga ang matag siyudad makagama og ilang ordinansa.

Giuna nila ang dakbayan sa Sugbo kay dako ang maong siyudad ug dunay daghang mga tunghaan. Gitan-aw pa nila karon kun unsa ang ubang katungod sa mga tinun-an nga angay’ng protehean. (BANAT NEWS)