Nanigbas kay gihatagan og salin

CEBU, Philippines - Usa ka construction worker ang gitigbas sa makadaghang higayon sa iyang kauban sulod sa ilang giabangang kwarto sa Sitio Riverside, Upper Banawa, Barangay Guadalupe, sa siyudad sa Sugbo niadtong Biyernes.

Giila ang biktima nga si Rommel Biolon, 31, construction worker samtang ang suspek ang kauban niya sa trabaho nga si Ramon Recta.

Sumala pa nga nasuko ang suspek dihang gihatagan sa biktima og salin sa sud-an niini. Ang suspek nainsulto kalit nga nilakaw apan sa pagbalik nagdala na kini og bolo ug gitigbas ang biktima.

"Wala man kuno ni sila'y conflict o unsa pa nga panagbikil sa una apan niana ning biktima nga silingan kuno ni sila sa Toledo. Wala sad kahibaw ning biktima kung nganong gikalitan lang siya'g tigbas. Sa pagkakaron, wala pa ‘tay nakita nga laing motibo gawas atong nainsulto tungod sa sud-an," sigon ni Police Officer 1 Michael Angelo Singson.

Nakaangkon og mga samad tinigbasan ang biktima sa iyang wala nga siko, tudlo, wala nga kilay, ug ibabaw nga bahin sa ngabil hinungdan sa pagkalandig niini sa Cebu City Medical Center.

Padayon pang giimbestigaran sa kapolisan ang kaso ug padayon pang gipangita ang suspek. (BANAT NEWS)