Bag-ong Police Station 2 sa MCPO sugdan og tukod
CEBU, Philippines - Gipangulohan ni PNP Chief Allan Purisima ang groundbreaking ceremony sa tukoron nga bag-ong building sa Police Station 2 sa dalan Albaño sa Barangay Bakilid, Mandaue City gikan sa karaan niining nahimutangan sa barangay hall sa Subangdaku.
Si Purisima kuyog ni Police Regional Director Chief Superintendent Prudencio Tom Bañas ug ni MCPO director Senior Superintendent Petronille Baldebrin.
Si Mayor Jonas Cortes sa habig sa kagamhanan sa maong dakbayan mao usab ang nangulo sa pagtambong uban sa mga barangay opisyal sa Banilad nga gipangulohan ni Kapitan Dionisio Villamor.
Human sa gihimo nga groundbreaking ceremony gisunod usab ang pagpahigayon sa pagpinirmahay sa Memorandum of Agreement (MOA) uban ni Cortes nga nagrepresentar sa siyudad ug ang managsuong Jerry ug James Uy nga nagrepresentar sa Everjust Realty and Development Corps.
Gawas sa luna nga tukoran sa maong police station sila usab maoy moabaga sa kantidad nga P3 milyones ngadto sa P4 milyones alang sa building nga tukoron.
Si Cortes namahayag nga pagmatuod kini nga kung magtinabangay ang tanan daghang maayong mahimo. (BANAT NEWS)
- Latest
