DTR nakalangan sa sweldo
CEBU, Philippines - Dugay nga pagduso sa ilang Daily Time Record (DTR) ang hinungdan sa kalangan sa ilang sweldo.
Gipahibawo sa kasamtangang pangulo sa Provincial Health Officer (PHO), Dr. Cynthia Genosolango, nga usahay moabot pa sa tulo ka buwan ang pagkalangan sa sweldo sa mga medical personnel sa probinsiya.
Ang provincial accountant nga si Marieto Ypil nagkanayon nga kadtong mga dunay approved plantilla nga napirmahan sa gobernador na-proseso na ang mga sweldo niini.
Gipasabot ni Ypil nga kung nakatuman lang sa mga rekisitos ang maong mga kawani ma-proseso dayun ang ilang sweldo.
Giangkon ni Lia Pangatungan, in-charge sa pagproseso sa mga sweldo, nga duna pa’y pipila ka mga pending ug wala masweldohi tungod kay wala pa usab makaduso sa ilang mga DTR nga basehan kung pila ka adlaw nagtrabaho ang kawani.
Kapin sa 600 ka mga nurse ug ubang medical personnel sa 16 ka district hospitals sa probinsiya ang manual pa ang pag-proseso sa ilang sweldo.
Gipaningkamutan nga maapil sila sa biometric system aron madali na ang pag-proseso sa ilang sweldo.
Dunay mga lagyong mga lugar nga dugay makahatud sa ilang DTR hinungdang dugay usab sila makadawat sa ilang sweldo. (Brenda D. Batuto/GMR)(BANAT NEWS)
- Latest
