Cebu City gitagalan sa Mandaue

CEBU, Philippines - Gitagalan sa kagamhanan sa dakbayan sa Mandaue ang kagamhanan sa dakbayan sa Sugbo hangtud Nobiyembre 30 sa pagduso sa mga gikinahanglan nga dokumento sa ihawan.

Kini ang gipahibawo ni Mandaue City Tresurer, Atty. Regal Oliva.

Naglakip sa gikinahanglan nga mga dokumento mao ang business permit, fire clearance, environmental clearance ug uban  pa.

Matud ni Oliva nga nagkinahanglan usab og mga dokumento nga maoy nagmatuod nga ang operasyon sa ihawan gitumong alang sa pagserbisyo ug dili negosyo aron dili makolektahan og buhis sa kagamhanan sa dakbayan sa Mandaue.

Wala’y lugway nga ihatag ang iyang buhatan gawas lang kun mangayo ug motugot si Mandaue City Mayor Jonas Cortes.

Nadiskubrehan ang kakulian sa operasyon sa ihawan nga nahimutang sa Mahiga Creek sa barangay Subangdaku nga gipadagan sa kagamhanan sa dakbayan sa Sugbo dihang gihimo ang paghawan sa mga ilegal nga istraktura nga nahimutang sa sapa nga nakaingon sa mga pagbaha sa panahon usab nga kusog ang pagbunok sa uwan. (Romeo T. Limpangog/GMR)(BANAT NEWS)