Dry-run ra kuno

CEBU, Philippines - Gihimakak sa abogado sa  kontrobersyal nga East Paris KTV nga nibalik na sila og operate human sila gipasirad-an sa miaging tuig tungod sa pasangil nga nagpasundayag sila og malaw-ay nga talan-awon. Sa gipadala nga suwat sa abogado sa maong establisamento nga si Atty. Inocencio dela Cerna ngadto ni Lucille Mercado,pangulo sa Cebu City Anti-Indecency Board (CAIB), ilang giangkon nga ilang gibuksan ang ilang KTV bar.

Matud niya nga usa lang kini ka dry-run aron masiguro ang seguridad sa ilang umaabot nga kustomer ug ilang operasyon.

Niadtong Disyembre 30 sa miaging tuig gipasirad-an sa CAIB ang Las Vegas Music Lounge nga mao ang gikahimutangan karon sa East Paris KTV tungod sa paglapas sa City Ordinance 1408 nga nagdili sa malaw-ay ug hilas nga mga pasundayag sa mga bars.

Ang business permit sa Las Vegas Music Lounge kaniadto gipanag-iya kini sa usa ka Royet Ched Malabay samtang ang East Paris KTV gipanag-iya sa usa ka Ma. Kristina Mondragon.

Ubos sa maong ordinansa dili tugutan nga mag-operate og balik ang gipasira nga establisamento kung mao gihapon ang modus sa ilang negosyo. Si Mayor Michael Rama nagdumili paghatag og komento bahin niini. (Khacel Anne Diel Sanchez/EIM)(BANAT NEWS)