Lawas naputol

CEBU, Philippines - Naputol ang lawas sa anak sa konsehal sa lungsod sa Balamban samtang tulo ka trabahante ang nangaangol human nabuthan sa usa ka tangke sa oxygen samtang nagtrabaho sa welding kagahapon diha sa barangay Baliwagan.

Giila ang namatay nga si Marquel Pilapil, anak ni Balamban Councilor Abel Pilapil.  Samtang ang nasamdan mao sila si Grace Capangpangan, secretary sa maong shop, laing duha ka mga lalaki nga giila lamang sa pangalan nga Ranulfo ug Nestor pulos mga welders sa maong shop.

Usa sa mga trabahante sa maong shop  miingon nga nakadungog sila og sipa kaayong buto ug sa ilang pagsusi nakita nila ang naputol na nga si Marquel nga gituohan sa mga imbestigador nga maoy nasentro sa pagbuto.

Samtang laing tulo ka mga trabahante nga samdan nangaigo sa splinters sa mibuto nga tangke ug daling gidala sa Balamban District Hospital ug gibalhin sa tambalanan sa dakbayan sa Sugbo.

Gidudahan nga mihungaw ang tanke sa oxygen ug gidakop ang kalayo gikan sa gi-welding nga bus de pasaheroan duol sa maong tangke.

Makita sa lugar nahitaboan ang fragments sa tanke sa oxygen nga maayong pagkalumping ug ang pipila ka bahin niini naabot pa sa usa ka balay sa atbang.

Padayon nga nihimo og imbestigasyon ang kapulisan sa lungsod sa Balamban ug nakig-alayon na sila sa mga sakop sa Bureau of Fire Protection aron pagtino sa hinungdan sa maong aksidente.( /EIM)(BANAT NEWS)