Depresyon maoy hinungdan

CEBU, Philippines - Nagtuo ang sikolohiya nga depresyon ug ang kabatan-on sa inahan maoy nagtukmod niini nga nalamba ang iyang usa pa ka tuig nga anak nga nakaingon sa kamatayon sa bata didto sa Poblacion II, siyudad sa Carcar.

Si Dr. Rene Obra, pangulo sa Center for Behavioral Sciences sa Vicente Sotto Memorial Medical Center miingon nga posibleng tungod kay 18 anyos pa lang ang babaye ug mao pa kini ang una niyang anak posible dili pa kini andam sa iyang responsibilidad isip usa ka inahan.

Duna say papel niini ang kalit nga pag-usab sa level sa hormones sa mga babaye ilabi na sa mga bag-ong nanganak.

Gidugang ni Obra nga posible usab nga ang maong inahan nakasinati og bipolar problem, usa ka psychiatric condition diin ang inahan dunay “mood-swing” o ang pag-usab sa batasan.

Bisan si Dr. Cornelio Banaag Jr. kinsa usa usab ka psychiatrist gikan sa Medical City Hospital sa Pasig City mihulagway nga posibleng gumikan sa depresyon maong nalabay sa babaye ang iyang anak.

Aron maminusan ang mga ingon niining insidente ang ilang grupo nagplano nga mobutang og hotline sa Sugbo nga mahimong matawgan aron kapangayoan og tambag.

Kini pagatawgon og “Hopeline” nga diin kadtong makasinati og depresyon apan walay kasumbungan mahimo silang motawag sa hotline aron dunay kapagawsan sa ilang problema.

Gihulagway sa duha nga kun dili dayon maaksyunan ang depresyon posible kining mosangpot sa paghikog.  (BANAT NEWS)