Nasudla’g espiritu

CEBU, Philippines - Kapin sa napulo ka mga estudyante sa Barangay Toong sa bukirang bahin sa Cebu City ang giingong nasudlan sa dautang espiritu kagahapon.

Ang mga bata daling gidala sa Mary's Little Children Community sa Tabunok, Talisay City diin nagbase si Monsignor Fred Kriekenbeek, usa ka inilang pari nga maantigong mag-exorcise.

Kasagaran sa mga giingong nasudlan anaa sa Grade 7 ug 8 samtang dunay usa sa Grade 4 nga pulos nagtungha sa Toong Integrated School.

Matud ni Toong barangay kagawad Milven Bacalso, ilang gidala ang 10 ka mga bata ngadto sa Talisay tungod sa sugyot sa pari sa Buhisan Shrine.

Ang mga sakop sa Cebu City Quick Response Team maoy mitabang kanila paghatud sa mga bata ngadto sa Talisay.

Sumala pa nga dunay maestra nga napugos pagpatago sa kapilya kay matud pa maoy giinitan sa dautang espiritu.

Si Msgr. Kriekenbeek mipahigayon og pag-ampo alang sa mga bata  nga gitawag og deliverance prayer.

Sa iyang bahin, ang tigpamaba sa Cebu Archdiocese Monsignor Joseph Tan namahayag nga ang pag-ampo maoy hinagiban batok sa mga dautan.

"For those directly concerned in supernatural phenomenon that suggests diabolical possessions, it is important to bring them to priests for blessing and prayer. Taking them to Msgr. Fred is a very positive move as he is experienced in healing and deliverance prayer," si Tan mipasabot.

Iyang gisugyot nga tapokon ang pamilya sa mga bata ug magdungan og ampo aron iiway sa dautan ang ilang mga kabanay.

Iya usab nga gipahinumduman ang mga ginikanan nga giyahan ang ilang mga anak ilabi na sa ilang basahon ug tan-awon nga salida. Gawas sa espirituhanong lakang, si Tan misugyot nga ipahiling ang mga bata sa usa ka medical doctor aron masuta kung nagkinahanglan sila og medical intervention.

Si Cebu City Disaster Risk Reduction Management Council chairman ug Konsehal Dave Tumulak nga personal nga miadto sa dapit miingon nga sa iyang tan-aw usa kini ka kaso sa “mass hysteria.”

Usa kini ka panghitabo nga diin magtakod-takod ang karatol, kahadlok ug emosyon sa usa ka pundok, way namatay niini apan peligro kun madakdak o mapantok ang ulo sa mga nag-hysteria.  (BANAT NEWS)