Modified tambutso bawal na sa Cebu City
CEBU, Philippines - Gidili na ang mga saba ug lanog nga tambutso sa motorsiklo dinhi sa Cebu City human giaprobahan na sa konseho sa dakbayan sa Sugbo ang ordinansa batok niini.
Ang Section 3 sa maong ordinansa nag-ingon nga gidili ang si bisan kinsang tawo nga mogamit og motor nga dunay “unnecessary” ug “unreasonable” ka saba nga tambutso nga makadisturbo sa pagkatulog sa mga tawo.
Kinahanglang dili molapas sa 84 decibels ang tingog sa motor sumala pa sa gipasar na nga “Ordinance Prohibiting the use or Operation of Motor Vehicles with Noisy Modified Mufflers within the City.”
Apan gihagatan og konsiderasyon ni Konsehal Roberto Cabarrubias ang mga sakyanan nga gigamit sa mga legal nga karera sa sakyanan ubos sa kondisyon nga may permiso kini gikan sa mayor, acting mayor o si bisan kinsa nga gihatagan og awtoridad sa mayor.
Ang madakpan sa unang higayon momulta og P500; P1,000 sa ikaduha; P3,000 sa ikatulo ug P5,000 sa ika-upat ug prisuhon og di molapas og tulo ka bulan.
Matud pa sa ordinansa, duna gyuy natural nga tingog ang tambutso apan duna lang g’yuy mga tawong tuyoan gyud pag-ilis og tambutso nga maglanog-lanog.
Si Konsehal Roberto Cabarrubias ang nangamahan sa maong ordinansa nga gibase sa City Ordinance 309 kon Anti- Noise Ordinance nga nagdili sa paggamit sa mga motor nga lanog ang tambutso gikan alas-7 sa gabii hangtod sa alas-5 sa buntag. (BANAT NEWS)
- Latest
