Misukol sa drug raid napatay

CEBU, Philippines - Patay ang usa ka lalaki human kini migawas nga nagdala og armas atol sa raid sa mga sakop sa Provincial Intelligence Branch (PIB) sa Cebu Provincial Police Office (CPPO) sa Barangay Talayong, lungsod sa Badian.

Ang napatay sa kapolisan naila nga si Michael Elegino, igsuon sa usa sa mga target sa kapulisan nga gidudahang tigpayuhot og drugas sa lugar.

Samtang sikop ‘sab ang mag live-in partner nga sila si Kurt Ruzzell Cosedo ug Llelanda Elegino nga nagpuyo sa maong lugar.

Matud pa ni Superintendent Rodolfo Albutra ang hepe sa PIB,  gibaligyaan sa managkapuyo og usa ka paketeng shabu ang poseur buyer hinungdan nga gisikop ang duha.

Apan ang igsuon sa babaye nga si Michael daling migawas dala ang improvised shotgun.

Tungod niini napugos ang mga polis pinangulohan sa team leader nga si Senior Inspector Leo Logroño pagpusil kang Michael kinsa milipot sa luyo sa balay.

“Pagkagubot sa atubangan among gisundan sa luyo kay mikuha man siya og pusil maong nagkabulagaan, paunahay na lang,” matud pa ni Logroño.

Sigun pa ni Logroño nga naila nga “tough guy” o naila nga maldito sa maong lugar si Michael nga kanunay nga magdala og armas.

Gidala sa Badian District Hospital si Michael apan nakabsan kini sa iyang kinabuhi.

Nakuha sa kapulisan gikan sa mag live-in partner ang ubay-ubay nga mga drugas nga mikantidad og kapin P100,000, buy-bust money nga duha ka libo ka pesos, timbangan ug ang armas nga homemade shotgun.

Ang mag live-in partner nga nahinabi sa mga tigbalita miingon nga gumikan sa kawad-on maong misulod sila sa maong ilegal nga negosyo. (BANAT NEWS)