Maniniyot gibuwagan sa uyab nagpusil sa ulo

CEBU, Philippines – Usa ka 24 -anyos nga lalaki ang nagpusil sa iyang ulo tungod kay giingong gibulagan sa uyab niini nga usa ka langyaw diha sa Villa Aurora, Barangay Kasambagan, ning dakbayan sa Sugbo. Ang nagpakamatay naila nga si Kazuo Olivar, usa ka photographer ug lumad nga taga Tandog, lungsod sa Medellin.

Ang imbestigador sa Homicide Section sa Cebu City Police Office nga si Senior Police Officer 1 Rommel Bancog nga nahinabi sa Banat News mibutyag nga ang mga kabanay sa namatay mibutyag nga bag-ohay lang gibuwagan sa 25-anyos nga Danish nga uyab si Olivar.

Gikatahong miuli pa sa Medellin si Olivar ug nangita og armas ug mibalik sa balay sa uyab nga langyaw ug didto naghikog.

Pasado ala-una sa kadlawon sa dihang misulod si Olivar sa lawak sa langyaw ug nagpabuto sa armas. Sa kahadlok sa langyaw dali kini nga minaog aron mangayo og tabang sa guwardiya sa ubos nga bahin apan lain nga sipa nga buto ang ilang nadungog ug sa ilang pagsubay nagbuy-od na si Olivar ug duna’y igo sa ulo. Narekober sa kapulisan ang usa ka revolver nga armas ug duha ka basiyo sa bala sa crime scene. Gidala si Olivar sa usa ka pribadong tambalanan tungod sa samad sa ulo nga milapos sa pikas nga bahin niini. – /EIM) (BANAT NEWS)