Presyo sa shabu gi ‘bagsak presyo’
CEBU, Philippines - Gumikan sa kompetisyon sa lain nga mga tigpayuhot og ilegal nga drugas, nag “bagsak presyo” sa iyang baligya nga drugas ang usa ka level 2 drug pusher nga nadakpan sa buy- bust operation sa City Intelligence Branch (CIB) sa Cebu City Police Office diha sa Sitio Mahayahay, Barangay Calamba ning dakbayan sa Sugbo.
Kini ang gitug-an sa dinakpan nga si Abram Villanueva, 25, nagpuyo sa maong lugar atol sa pakighinabi sa Banat News diha sa CIB. Ang kawad-on maoy rason nganong nisulod sa illegal drug trade si Villanueva.
Sulod sa buhatan sa CIB gitiwas sa mga operatiba ang pag-imbentaryo sa mga nakuha nga ilegal nga drugas.
Ang dinakpan mibutyag nga ang usa ka pakete sa drugas iya na lang gibaligya og tag P250 inay tag P500. Kini mitug-an nga pwerte nang daghana sa kompetisyon.
Sigun pa ni Police Inspector Gomersendo Mandawe ang deputy chief sa City Intelligence Branch nga nahinabi sa Banat News nga dul-an usa ka semana ang ilang surveillance sa suspetsado.
Dugang pa ni Mandawe nga bag-o pa lang nakagawas gikan sa Cebu City Jail si Villanueva gumikan gihapon sa kaso sa ilegal nga drugas.
“Oktubre pa ko naka gawas sir, wala man gud ko’y laing trabaho, dawaton na lang g’yud nako ni tanan,” sigun pa sa dinakpan.
Si Villanueva napalitan og balor P500 nga shabu sa mga polis. Nasayran usab nga kompleto sa luhong gamit ang suspek bisan sa kagamay sa lawak niining giabangan tungod kay airconditioned kini ug may flat screen tv ug uban pang mahalong mga gamit.
Nakuha sa kapulisan gikan sa sulod sa lawak ni Villanueva ang 450 ka gagmay nga pakete sa drugas, usa ka medium size nga mikantidad og P239,000 ug cash nga P7,300.
Gipasabot sab ni Mandawe nga sa ilang buhatan na lang sab nila gitiwas ang imbentaryo alang sa ilang seguridad. (BANAT NEWS)
- Latest
