Sikyu mangatulog lang?

CEBU, Philippines - Samtang gihugtan sa kapolisan ang pagbantay batok sa mga pagpanulis sa nagkalainlaing establesemento sa dakbayan sa Sugbo, ubang guwardiya ang giingong relax kaayo ug matulog lang sa pwesto.

Kini ang gibutyag sa hepe sa San Nicolas Police Station, Sr. Insp. Chuck Barandog, kinsa miangkon nga na-pressure sila sa “one strike policy” nga gipatuman sa kapolisan.

Ang tanang station commanders mihimo sa ilang saad sa kaandam pagbalhin gawas sa dakbayan sa Sugbo sa higayun nga may dagku pa’ng tulis nga mahitabo ug mipirma sab sa usa ka kasabutan tali ni Mayor Mike Rama.

Sigun ni Barandog nga wala siya’y tarung tulog sulod sa pipila ka adlaw na human siya nangunay sa pagsubay sa iyang mga sakop aron maseguro nga dunay saktong deployment duol sa mga convenient store, gasoline stations ug uban pa nga posibleng target sa mga tulisan.

Matud ni Barandog nga lakip na gani ang ilang administrative staff giapil na sa pag-deploy sa gawas.

Apan matud ni Barandog nga usa ka guwardiya iya nasakpang natulog sa pwesto.

“Naa ko’y nasakpan nga natug sa ilang pwesto,” sigun ni Barandog.

Giimbitar ni Barandog ang maong guwardiya sa iyang buhatan ug mihimo og report ngadto sa Firearms, Explosives, Security Agencies and Guards Supervisory Section (FESAGSS) alang sa posibleng kaso’ng administratiba nga atubangon sa guwardiya.

Ang “one strike policy” sa kapolisan gipatuman human sa sunod-sunod nga pagpanulis lakip sa tulis sa usa ka convenient store pipila ka metros lang ang gilay-on gikan sa Cebu City Police Office Headquarters sa Camp Sotero Cahabug. (BANAT NEWS)