Pagdawat og city scholars giusab

CEBU, Philippines - Kadto’ng mga tinun-an nga nagtungha sa mga public high school nga duol ra sa utlanan sa dakbayan sa Sugbo ug kadtong nag-eskwela isip scholars sa mga private high schools may kahigayunan na nga mahimo’ng college scholar sa dakbayan.

Ang Cebu City Scholarship Committee nga gipangulohan mismo ni Mayor Michael Rama mihimo og kausaban sa Implementing Rules and Regulations ug General Guidelines sa paghatag og scholarship ngadto sa mga graduwado sa public high schools.

Sa pagsugod pagpatuman sa paghatag og scholarship grants, kadto ra’ng mga tinun-an nga mogradwar sa mga public high schools dinhi sa dakbayan sa Sugbo ang gitugotan nga makapahimulos sa tag P10 mil nga scholarship grants kada semester sa pagtungha nila sa kolehiyo.

Nahukman sa mga sakop sa Scholarship Committee nga tugotan na nga makapahimulos sa scholarship grants kadtong mga mogradwar sa public high schools nga nahimutang duol sa utlanan sa dakbayan sa Sugbo nga didto mitungha ang bata kay mas sayon gikan sa ilang gipuy-an.

Apil nga makapahimulos mao kadto’ng mga tinun-an sa private high schools nga scholars sa ilang pagtungha kun makapakita sila og kamatuoran nga migradwar sila gikan sa public elementary school sa dakbayan sa Sugbo.

Gitataw g’yud hinuon sa lagda nga ang mga tinun-an nga makapahimulos isip “city scholar” mao ra kadtong ang mga ginikanan nagpuyo ug rehistrado nga botante sa dakbayan sa Sugbo.

Ang uban nga mahimo’ng dawaton nga scholar mao kadtong mga migradwar sa Alternative Learning System (ALS) ug ang nakapasar sa Philippine Educational Placement Test (PEPT).

Ang kamatuoran nga ang ginikanan nagpuyo g’yud sa dakbayan sa Sugbo mao nga aduna siya’y billing sa tubig ug kuryente, SSS ug GSIS ID o kaha bisan unsa nga government identification cards nga magpamatuod sa iyang address.

Apan labaw sa tanan mao ang Comelec certification nga nagmatuod nga sila nakabotar sa mga eleksyon gikan niadto’ng 2010. (BANAT NEWS)