Minor, laing lima nadakpan sa drugas

CEBU, Philippines - Menor de edad naaktohan sa kapolisan nga naghupot og duha ka dagkung putos sa marijuana alas 3 sa kadlawon niadtong Huwebes sa Poblacion, lungsod sa Liloan. Nasakpan ang 14-anyos sa iyang inahan nga nagdala og marijuana sulod sa sudlanan sa sigarilyo hinungdan nga iya kining gi-report sa kapolisan.

Gidakop ang maong menor de edad ug gi-turnover sa buhatan sa Department of Social Welfare and Development.

Sa samang adlaw, usa ka lalaki ang nasikop atol sa beat patrol nga gipahigayun sa kapolisan sa lungsod sa Consolacion human makuhai og ginadiling drugas pasado alas 11 sa gabii.

Nakuha gikan kang Mark Aldrin Bati Calinawan, 20, taga sitio Laray, Pitogo, sa maong lungsod ang usa ka gamay’ng pakete sa gituohang shabu.

Samtang sa lungsod sa Borbon, nasikop ang usa ka Benedicto "Kolkol" Hortezuela, 37, taga barangay Cadaruhan human nibaligya og shabu sa poseur-buyer sa kantidad nga P500 atol sa buy -bust operation.

Nasakmit kang Hortezuela ang usa ka daku ug laing tulo ka gagmay’ng pakete sa gituohang shabu, tulo ka disposable lighters, usa ka gamay’ng gunting, tooter, selpon ug P500 nga buy-bust money.

Tulo usab ka lalaki ang nasikop sa kapolisan samtang nag-pot session sa abling payag sa Looc, dakbayan sa Danao pasado alas 12 sa udto niadtong Huwebes.

Ang mga nasikop mao sila si Dennis Maranga Pulvera, 38, taga Poblacion, Compostela; Rosendo Peñas Barriga Jr, 43, taga Looc, dakbayan sa Danao ug Rodel Parcon Ceniza, 32, taga Cogon, Compostela.

Nasakmit gikan sa mga suspek ang tulo ka gagmay’ng pakete sa gituohang shabu nga nagkantidad matag usa og P472 ug nagkadaiyang drug paraphernalia. (Jean Lumapas, USJ-R Masscom Intern/GMR)(BANAT NEWS)