Parada kontra drugas karon

CEBU, Philippines - Giawhag ni Cebu City Mayor Michael Rama ang tanang kapitan sa kabarangayan sa dakbayan sa Sugbo pagmugna g’yud og Barangay Anti-Drug Abuse Council (BADAC)  sa tagsa-tagsa nila ka barangay aron moabag sa kampanya pagsumpo sa problema sa ilegal nga drugas.

Kagahapong adlawa, usa ka oathtaking ceremony ang gihimo pinangulohan ni Atty. Paul Oaminal kinsa maoy presiding officer sa City Anti-Drug Abuse Council (CADAC). Si Dr. Alice Utlang, hepe sa City Office for Substance Abuse and Prevention (COSAP), miingon nga 500 ka tawo ang nitambong sa maong oathtaking.

Sila nanumpa nga buntogon ang problema sa ilegal nga drugas diha sa ilang tagsatagsa ka mga barangay. Mitambong sa maong oathtaking  ang mga  barangay kapitan, police station chiefs, chairman sa committee  on peace and order sa mga barangay ingon man mga tanod.

Matud ni Rama nga kaniadto pa unta nilihok ang BADAC pinaagi sa pagpakatap og impormasyon ug pagtudlo bahin sa paglikay sa ilegal nga drugas. Ang mayor midugang nga kung di magtinabangay ang polis, mayor, mga barangay officials batok sa ilegal nga drugas, padung g’yud sa pamilya ang problema.

Karong adlawa ipahigayon ang “March for Drug Free Cebu” magsugod ala-una diha sa Fuente Osmeña circle hangtod sa Plaza Independencia nga nagdala og tema nga : “Ang Pag-abuso sa Ginadili nga Drugas, mapugngan ug matambalan: Legalisasyon sa Marijuana supakon!” (Sheilame Medil ,USJ-R Intern/EIM)(BANAT NEWS)