One strike policy

CEBU, Philippines - Hepe sa Cebu City Police Office miingon nga dili “three-strike” policy kondili “one-strike” policy lang ang iyang ipatuman aron magtarong ang mga hepe ug mga sakop sa tanang police stations sa dakbayan sa Sugbo batok sa mga pagpanulis.

Andam usab si Senior Superintendent Noli Romana pagparelibo kung dunay usa apan dako nga insidente sa pagpanulis nga mahitabo dinhi sa dakbayan.

Si Romana nagkanayon nga usa sa silot nga  nauyonan sa Police Community Advisory Council (PCAC) ang suspension sa monthly allowance nga P2 mil gikan sa dakbayan ug pagrelibo sa tibuok personnel sa usa ka police station.

Matud pa ni Romana nga ang CCPO maoy gikonsiderar nga “Cebu’s Finest” mao nga kinahanglan ang propesyonalismo, sulondon ug kasaligan nga angay imentinar sa mosunod nga mga katuigan.

“There are policemen na talagang gumagawa ng maganda sa station. Mayroon ding relax, merong mga lapses, misdemeanor that emphasizes (lack of) teamwork in the station. The whole station should act as one. The whole station should be cohesive in implementing its programs,” pasabot pang Romana.

Matud pa niya nga niadtong bulan sa Mayo mipatuman siya og reshuffling sa mga station chiefs tungod sa susamang rason, nagbunga kini og maayo, apan karon nabalik na usab mao nga kinahanglan nga mangita na usab og bag-ong kausaban.

Usa sa gustong mahitabo ni Romana human ma-relieve ang mga polis mao ang pagpaubos kanila sa “back to basic” training tungod kay mao kini ang hinungdan nga kompiyansador na ang mga polis.

Apan si Police Regional Office-7 director Prudencio Tom Bañas sa iyang bahin miingon nga kinahanglang adunay due process.

“Hindi naman pangkalahatan ang ipu-pullout, we will evaluate and assess kung talagang hindi sila nagtatrabaho, or talagang kung sino ang responsible for this. Pero wag naman natin i-punish those who are doing well,” pasabot pang Bañas.

Mipahinumdom si Bañas nga paspas kaayong mopasidungog ang PNP niadtong mga polis nga magtinarong ug dunay maayong nahimo, apan kadtong magpabadlong duna say silot nga nagpaabot kanila.

Sa pagkakaron, di pa makaingon si Bañas kun husto ba kung ang tibuok police station personnel ang relibohan, paabuton pa niya ang report sa hinungdan niini. Si Mayor Michael Rama miawhag nga kinahanglang magkahiusa sila sa pagsumpo sa mga krimen sa siyudad.(Sheriza Mae Uy ug Grace Lacamiento sa The Freeman/EIM)(BANAT NEWS)