Taxi drayber nanghinol sa Koryana

CEBU, Philippines - Gisikop sa kapolisan ang taxi drayber kinsa gipasanginlan nga mihinol sa iyang pasahero nga Koryana niadtong nakalabay nga kadlawon sa may Mango Square, dakbayan sa Sugbo.

Ang suspek naila nga si Jay Lequin, 39, taga dakbayan sa Bogo, ug temporaryong nagpuyo sa Subangdaku, Mandaue ug drayber sa Holiday Taxi samtang ang mireklamo naila nga si Namyi Woo, 20, taga Seoul, South Korea ug temporaryo nga nagpuyo sa Barangay Guadalupe, dakbayan sa Sugbo.

Sa imbestigasyon sa Fuente Police nasayran nga misakay ang maong Koryana gikan sa Mango Square ug nagpahatud unta sa iyanggipuy-an.

Apan giingong wala gihatud sa drayber sa iyang gipuy-an si Woo ug igo lang kini gilibot-libot ug mikupot sa iyang kamot, mihinol sa iyang dughan, paa ug mihalok pa sa iyang ngabil.

Atol nga dunay nagpatrolya nga kapolisan nga gipangulohan ni PO3 Antonio Asoy ug sa pagkakita ni Woo dali kini nga nangayo og pakitabang ug gisikop ang taxi drayber.

Matud sa kapolisan nga posibleng nagtuo ang drayber sa taxi nga hubog ang iyang pasahero nga Koryana hinungdan nga kini iyang gihinol.

Gitanggong na sa karsel sa Fuente Police Station ang dinakpan nga gikatakdang pasakaan og tukmang kaso. (BANAT NEWS)