Sports hub tukoron sa SRP

CEBU, Philippines - Supak ang manager sa South Road Properties nga ang gilaraw nga Cebu City One-Stop Sports Hub anha tukora sa yuta sa SRP nga adunay interesado nga mopalit.

Matud ni Roberto Varquez nga dili siya supak nga ang dakbayan magtukod og sports hub apan mas labing maayo nga adto sa ubang mga dapit sa SRP nga wala pa’y interesado’ng moangkon.

Si Edward Jayco, chairman sa Cebu City Sports Commission, miingon nga ang pagatukuron nga Sports hub usa ka nindot nga proyekto kay mao kini ang bugtong sports hub sa nasud.

Apan matud ni Jayco nga bisan og matukod na ang maong sports hub sa SRP dili mahimo’ng masalikway ang Cebu City Sports Center kay mao kini karon ang labing active nga sports center sa Sugbo. Kun madayon ang pagtukod og sports hub sa SRP Lot 7 tawgon unya kini og Olympic City o kaha Olympic village of Cebu nga adunay gidak-on nga napulo ka hektareya.

Plano nga ang sports hub butangan og swimming pool, basketball court, track oval, tennis center ug uban pa. (BANAT NEWS)