Nadakpan naghupot og drugas

CEBU, Philippines - Suspetsado’ng drug user sa lungsod sa Liloan nadakpan ug nakuhaan og tulo ka pakete’ng shabu ug armas didto sa Sitio Bag-ong Dalan sa Barangay Yati kaniadto’ng Lunes sa gabii.

Ang nadakpan mao si Edmon Tayong, 36, minyo nga taga Barangay Poblacion, Liloan. Miresponde ang kapolisan tungod sa tawag nga adunay armado’ng tawo sa ilang lugar ug diha’ng girespondehan sa mga polis nakita nila nga nagdala g’yud og armas ang lalaki mao nga ilang gidakop.

Pagrekisa nakuha ang 357 magnum revolver nga may mga bala ug ang tulo ka pakete’ng shabu.

Sa lungsod sa Sibonga, suspetsado’ng pusher nadakpan ug nakuhaan usab og tulo ka pakete sa gituohang shabu.

Si Joven Fano, 48, minyo ug taga Sitio Tugas, Brgy. Bolinawan mibaligya’g shabu sa poseur buyer. Misuway’g sibat si Fano diha nga nakabantay nga diha’y mga polis, apan nagukdan siya ug nadakpan. Nakuha usab ang P400 nga gituohang halin sa drugas.

Samtang tawo nga nanion og armas ngadto sa usa ka batan-ong lalaki sa Sitio Tagaytay, Brgy. Adlaon, dakbayan sa Sugbo gidakop ug nakuhaan og usa ka pakete’ng shabu kaniadto’ng Martes.

Ang nadakpan mao si Rotche Barcoso, 34, ug nagpuyo sa Sitio Tagaytay. Gipasanginlan siya sa batan-on nga nanion og armas human sila magkaaway.

Nakuhaan usab siya og .38 kalibre nga revolver nga may lima ka bala ug wala makapakita’g lisensya sa armas. Sa laing bahin, si Joey Herrera, executive director sa Cebu Provincial Anti-Drugs Abuse Council (CPADAC) miingon nga wala sila makadawat og report nga adunay shabu laboratory dinhi sa probinsya.

Nagtigum kagahapon ang executive committee sa CPADAC kauban ang Cebu Provincial Police Office ug Philippine Drug Enforcement Agency (PDEA)-7. (BANAT NEWS)