Isda nga sardinason dili usa Ipakuha

CEBU, Philippines -  Ang Bureau of Fisheries and Aquatic Resources (BFAR)-7 misugyot nga idili usa ang pagpakuha sugod karong Nobiyembre 15 sa tulo ka matang sa isda sa kadagatan dinhi sa Central Visayas.

Nabantayan sa kadagkoan sa BFAR-7 nga nagkagamay na ang mga isda nga makuha sa mga ordinaryo’ng mananagat dinhi sa rehiyon hinungdan nga mopahigayon sila og “close season” kon di pagpakuha sa mao nga mga isda.

Si Larson Tan, senior aquaculturist sa BFAR-7, miingon nga ubos sa Fisheries Administrative Order (FAO) 167 mahimo nila nga idili ang pagpakuha sa mga matang sa isda nga nagkagamay na ang similya hangtud nga kini managko na.

Gitataw hinuon ni Tan nga ang close season alang ra sa mga commercial fishing vessels. Ang pagdili molungtad sa March 15 sunod tuig.

Ang idili pagpakuha mao ang mga klase sa isda nga “sardines” sama sa tuloy, budburon, tagnipis, tamban, hawol-hawol, ug klase sa isda nga “mackerel” sama sa tikab, anduhaw, hasa-hasa, alumahan ug bulao ug ang klase sa isda nga gitawag og herring.

Apan ang mga ordinaryo’ng mangingisda nga managat lang alang sa ilang pagkaon tugotan ra hinuon nga makapanagat sa bisan unsa’ng klase sa isda.

Ang mga lugar nga malakip sa close season maglakip sa Danao River, pinakatumoy nga bahin sa Bantayan Island ngadto na sa Madridejos, Gigantes Island, Ulutaya Island sa Culasi sa Capiz Province, Iloilo, Guimaras strait padung na sa Negros Occidental.

Kadtong mga dili motuman silotan nga maglakip sa multa, pagkanselar sa ilang lisensiya pagpanagat ug pagkabilanggo. (BANAT NEWS)